טרם נמסר שיעור על פרק זה

דברי הימים א פרק-טז

{א} וַיָּבִיאוּ אֶת אֲרוֹן הָאֱלֹהִים וַיַּצִּיגוּ אֹתוֹ בְּתוֹךְ הָאֹהֶל אֲשֶׁר נָטָה לוֹ דָּוִיד וַיַּקְרִיבוּ עֹלוֹת וּשְׁלָמִים לִפְנֵי הָאֱלֹהִים: {ב} וַיְכַל דָּוִיד מֵהַעֲלוֹת הָעֹלָה וְהַשְּׁלָמִים וַיְבָרֶךְ אֶת הָעָם בְּשֵׁם יְהוָה: {ג} וַיְחַלֵּק לְכָל אִישׁ יִשְׂרָאֵל מֵאִישׁ וְעַד אִשָּׁה לְאִישׁ כִּכַּר לֶחֶם וְאֶשְׁפָּר וַאֲשִׁישָׁה: {ד} וַיִּתֵּן לִפְנֵי אֲרוֹן יְהוָה מִן הַלְוִיִּם מְשָׁרְתִים וּלְהַזְכִּיר וּלְהוֹדוֹת וּלְהַלֵּל לַיהוָה אֱלֹהֵי יִשְׂרָאֵל: (ס) {ה} אָסָף הָרֹאשׁ וּמִשְׁנֵהוּ זְכַרְיָה יְעִיאֵל וּשְׁמִירָמוֹת וִיחִיאֵל וּמַתִּתְיָה וֶאֱלִיאָב וּבְנָיָהוּ וְעֹבֵד אֱדֹם וִיעִיאֵל בִּכְלֵי נְבָלִים וּבְכִנֹּרוֹת וְאָסָף בַּמְצִלְתַּיִם מַשְׁמִיעַ: {ו} וּבְנָיָהוּ וְיַחֲזִיאֵל הַכֹּהֲנִים בַּחֲצֹצְרוֹת תָּמִיד לִפְנֵי אֲרוֹן בְּרִית הָאֱלֹהִים: {ז} בַּיּוֹם הַהוּא אָז נָתַן דָּוִיד בָּרֹאשׁ לְהֹדוֹת לַיהוָה בְּיַד אָסָף וְאֶחָיו: {ח}  הוֹדוּ לַיהוָה קִרְאוּ בִשְׁמוֹ (ס) הוֹדִיעוּ בָעַמִּים עֲלִילֹתָיו: {ט}  שִׁירוּ לוֹ זַמְּרוּ לוֹ (ס) שִׂיחוּ בְּכָל נִפְלְאֹתָיו: {י}  הִתְהַלְלוּ בְּשֵׁם קָדְשׁוֹ (ס) יִשְׂמַח לֵב מְבַקְשֵׁי יְהוָה: {יא}  דִּרְשׁוּ יְהוָה וְעֻזּוֹ (ס) בַּקְּשׁוּ פָנָיו תָּמִיד: {יב}  זִכְרוּ נִפְלְאֹתָיו אֲשֶׁר עָשָׂה (ס) מֹפְתָיו וּמִשְׁפְּטֵי פִיהוּ: {יג}  זֶרַע יִשְׂרָאֵל עַבְדּוֹ (ס) בְּנֵי יַעֲקֹב בְּחִירָיו: {יד}  הוּא יְהוָה אֱלֹהֵינוּ (ס) בְּכָל הָאָרֶץ מִשְׁפָּטָיו: {טו}  זִכְרוּ לְעוֹלָם בְּרִיתוֹ (ס) דָּבָר צִוָּה לְאֶלֶף דּוֹר: {טז}  אֲשֶׁר כָּרַת אֶת אַבְרָהָם (ס) וּשְׁבוּעָתוֹ לְיִצְחָק: {יז}  וַיַּעֲמִידֶהָ לְיַעֲקֹב לְחֹק (ס) לְיִשְׂרָאֵל בְּרִית עוֹלָם: {יח}  לֵאמֹר לְךָ אֶתֵּן אֶרֶץ כְּנָעַן (ס) חֶבֶל נַחֲלַתְכֶם: {יט}  בִּהְיוֹתְכֶם מְתֵי מִסְפָּר (ס) כִּמְעַט וְגָרִים בָּהּ: {כ}  וַיִּתְהַלְּכוּ מִגּוֹי אֶל גּוֹי (ס) וּמִמַּמְלָכָה אֶל עַם אַחֵר: {כא}  לֹא הִנִּיחַ לְאִישׁ לְעָשְׁקָם (ס) וַיּוֹכַח עֲלֵיהֶם מְלָכִים: {כב}  אַל תִּגְּעוּ בִּמְשִׁיחָי (ס) וּבִנְבִיאַי אַל תָּרֵעוּ: {כג}  שִׁירוּ לַיהוָה כָּל הָאָרֶץ (ס) בַּשְּׂרוּ מִיּוֹם אֶל יוֹם יְשׁוּעָתוֹ: {כד}  סַפְּרוּ בַגּוֹיִם אֶת כְּבוֹדוֹ (ס) בְּכָל הָעַמִּים נִפְלְאֹתָיו:{כה}  כִּי גָדוֹל יְהוָה וּמְהֻלָּל מְאֹד (ס) וְנוֹרָא הוּא עַל כָּל אֱלֹהִים: {כו}  כִּי כָּל אֱלֹהֵי הָעַמִּים אֱלִילִים (ס) וַיהוָה שָׁמַיִם עָשָׂה: {כז}  הוֹד וְהָדָר לְפָנָיו (ס) עֹז וְחֶדְוָה בִּמְקֹמוֹ: {כח}  הָבוּ לַיהוָה מִשְׁפְּחוֹת עַמִּים (ס) הָבוּ לַיהוָה כָּבוֹד וָעֹז:{כט}  הָבוּ לַיהוָה כְּבוֹד שְׁמוֹ (ס) שְׂאוּ מִנְחָה וּבֹאוּ לְפָנָיו הִשְׁתַּחֲווּ לַיהוָה בְּהַדְרַת קֹדֶשׁ: (ס) {ל} חִילוּ מִלְּפָנָיו כָּל הָאָרֶץ אַף תִּכּוֹן תֵּבֵל בַּל תִּמּוֹט: (ס){לא} יִשְׂמְחוּ הַשָּׁמַיִם וְתָגֵל הָאָרֶץ וְיֹאמְרוּ בַגּוֹיִם יְהוָה מָלָךְ: (ס) {לב} יִרְעַם הַיָּם וּמְלוֹאוֹ יַעֲלֹץ הַשָּׂדֶה וְכָל אֲשֶׁר בּוֹ: (ס) {לג} אָז יְרַנְּנוּ עֲצֵי הַיָּעַר מִלִּפְנֵי יְהוָה כִּי בָא לִשְׁפּוֹט אֶת הָאָרֶץ: (ס) {לד} הוֹדוּ לַיהוָה כִּי טוֹב כִּי לְעוֹלָם חַסְדּוֹ: (ס){לה}  וְאִמְרוּ הוֹשִׁיעֵנוּ אֱלֹהֵי יִשְׁעֵנוּ וְקַבְּצֵנוּ וְהַצִּילֵנוּ מִן הַגּוֹיִם (ס) לְהֹדוֹת לְשֵׁם קָדְשֶׁךָ לְהִשְׁתַּבֵּחַ בִּתְהִלָּתֶךָ: (ס) {לו}  בָּרוּךְ יְהוָה אֱלֹהֵי יִשְׂרָאֵל מִן הָעוֹלָם וְעַד הָעֹלָם וַיֹּאמְרוּ כָל הָעָם אָמֵן (ס) וְהַלֵּל לַיהוָה: {לז} וַיַּעֲזָב שָׁם לִפְנֵי אֲרוֹן בְּרִית יְהוָה לְאָסָף וּלְאֶחָיו לְשָׁרֵת לִפְנֵי הָאָרוֹן תָּמִיד לִדְבַר יוֹם בְּיוֹמוֹ: {לח}  וְעֹבֵד אֱדֹם וַאֲחֵיהֶם שִׁשִּׁים וּשְׁמוֹנָה (ס) וְעֹבֵד אֱדֹם בֶּן יְדִיתוּן וְחֹסָה לְשֹׁעֲרִים:{לט} וְאֵת צָדוֹק הַכֹּהֵן וְאֶחָיו הַכֹּהֲנִים לִפְנֵי מִשְׁכַּן יְהוָה בַּבָּמָה אֲשֶׁר בְּגִבְעוֹן:{מ} לְהַעֲלוֹת עֹלוֹת לַיהוָה עַל מִזְבַּח הָעֹלָה תָּמִיד לַבֹּקֶר וְלָעָרֶב וּלְכָל הַכָּתוּב בְּתוֹרַת יְהוָה אֲשֶׁר צִוָּה עַל יִשְׂרָאֵל: {מא} וְעִמָּהֶם הֵימָן וִידוּתוּן וּשְׁאָר הַבְּרוּרִים אֲשֶׁר נִקְּבוּ בְּשֵׁמוֹת לְהֹדוֹת לַיהוָה כִּי לְעוֹלָם חַסְדּוֹ: {מב} וְעִמָּהֶם הֵימָן וִידוּתוּן חֲצֹצְרוֹת וּמְצִלְתַּיִם לְמַשְׁמִיעִים וּכְלֵי שִׁיר הָאֱלֹהִים וּבְנֵי יְדוּתוּן לַשָּׁעַר:{מג} וַיֵּלְכוּ כָל הָעָם אִישׁ לְבֵיתוֹ וַיִּסֹּב דָּוִיד לְבָרֵךְ אֶת בֵּיתוֹ: (פ)